即除冇用配件 幾叻仔有計

猪拉多纳

　　每次賽事，唔少參賽馬匹出現配件變動，有啲成功，有啲失敗，原本跑得好嘅，無啦啦走去加嘢，結果變成畫蛇添足，又有部分配件點樣戴戴除除，都係冇作用，真係冇計。

　　今次谷戰亦唔例外，有部分馬匹在配件上加加減減，好似沈集成一對馬「比你高」及「幾叻仔」，1匹除鼻箍，另1匹除結舌帶，實際效用有冇，唔跑唔會知，不過，前駒配件今季已多次有轉變，刺唔刺激到好難講。反而，後駒就唔同，前仗跑得好地地，上次一綁脷，留都留唔到，今次唔只唔要冇用條帶，仲搵番潘頓騎，似係有計。

　　另外，第七場「環保戰士」，轉告廐初出，臨場吹「風」吹得好勁，賠率在尾段急劇變化，1匹處女馬由10倍賭到5倍開跑，憑乜咁信心！跑落有前冇後，直路絲毫沒有走勢可言。

　　環保戰士冷番可博

　　「環保戰士」呢次再出，田泰安繼續效力，配件方面，又係除去上次累事嘅眼罩，或者有實質幫助，而賠率立刻冷番晒，更覺有可博之道。