稱職騎師不易為

猪拉多纳

　　騎師在陣上搏老命、鬥志萬千，絕對係馬迷想見到嘅態度。相信冇一個馬迷想見到騎師比賽時遊魂，粗心大意策騎，或者全程「外遊」，總之草草了事。事關馬迷擺錢落去，如果睇你遊魂，不如食咗落肚好過。

　　但有時候，太過搏命亦唔係好事，陣上爭位魯莽，唔止危害他人安全，自己都冇着數，好似轉跑線咁，硬生生擯開其他馬，自己匹馬一樣有機會撞完散咗，亂晒步韻。

　　騎師比賽時具有競爭性係好事，咁至對得住馬迷，大前提係要顧及大局，如果墮馬意外因你而起，其他同行有咩損傷，個心都唔安樂，若果受傷情況更嚴重，自己點會過到自己。之所以，作為一位稱職嘅騎師，真係幾難，唔可以遊魂，又要打醒精神。