杜利萊宜戒「外遊」

猪拉多纳

　　法國騎師杜利萊，有着一份感染力，好多時佢贏完馬返凱旋門，啲馬迷對佢特別熱情，可能係互相影響，因為佢總係七情上面，笑到見牙唔見眼，畀人一種親切嘅感覺。

　　如果畀佢贏了場大賽，仲會跪地又拜又錫，總之，表現及動作誇張，務求令到在場馬迷個個好high，就算坐喺電視機旁邊嘅觀眾，唔多唔少都會感受到嗰種歡欣氣氛。

　　但對呢位熱情法國人嘅陣上表現，唔係有讚冇彈，佢贏馬一條龍係人都知，可惜成日跑馬蝕到暈，十場有七、八場硬係飛出外檔上，要知道，唔係隻隻坐騎咁有本事，可以在「外遊」讓賽的情況下衝贏對手，轉彎用咗力或無以為繼。所以，佢呢個缺點如果唔戒，在港策騎事業幾難會更進一步。