高路斯回歸 德國厄瓜做「大」騷

猪拉多纳

老將領軍做「大」騷！今晚國際熱身賽有德國惡鬥厄瓜多爾，由於撞正歐聯決賽啱啱先踢完，無法倚靠一班拜仁及多蒙特主力嘅「日耳曼戰車」，今戰重召老牌射手高路斯拍住一眾新血，夠本錢同火力強勁嘅厄瓜多爾開入球騷，1.68倍入球大趁熱食喇！

（無綫翡翠台周四凌晨2:30直播）
厄瓜多爾5戰勁入16球

雖然足智彩顯示德國係主隊，但查實呢場波係佢哋「美國之旅」嘅第1站，並冇主場之利。而新科歐聯冠軍拜仁同輸波嘅多蒙特，決賽後啱啱先返德國冇耐，絕大多數球員都唔會披甲。不過唔使驚，皆因「日耳曼戰車」今次重召德國史上上陣次數第2多嘅高路斯入伍，雖然佢已經34歲，但近2季喺拉素入咗32球，足證寶刀未老。加埋普多斯基幫手數胡，仲有年輕一輩如舒賀爾尼同達斯拿等為爭上位肯定搏老命，要射破對手大門絕對唔係難事o架！

對手厄瓜多爾嘅火力亦絕對唔嘢小，呢支有曼聯翼鋒路爾斯華倫西亞壓陣嘅南美洲球隊，近5戰夾埋足足入咗16球，其中4場更至少省3粒、全部都開出入球大，撞正近8戰有5場開大嘅德國，球迷可以睇番場入球大戰喇！