賓菲加搶葡盃當安慰獎

猪拉多纳

用「地獄黑仔王」嚟形容賓菲加最適合不過，呢支葡萄牙傳統勁旅今季兩度臨尾香，連環同葡超、歐霸盃錦標擦身而過，適逢今晚對甘馬雷斯場葡盃決賽係最後捧盃機會，賓菲加班手足當然想自04年再度染指錦標執番個桔，1.64倍「讓主」熱都要捧！（有線155周一凌晨0:15直播）

賓菲加以1分之差失落聯賽冠軍，今個月12號對波圖場「6分波」輸1:2無疑係致命傷，估唔到稍後喺歐霸盃決賽又係完場前畀車路士絕殺，短短4日內唔見兩隻盃，球會高層唔嬲就有鬼啦！
甘馬雷斯近5次入決賽輸晒

今晚場葡盃決賽喺奧爾拉斯國家球場上演，賓菲加足球總監雷哥斯達尋日話，會方已經安排咗一系列慶祝活動，賽前仲呼籲球迷帶住「開Party」嘅心情入場，似乎對捧盃志在必得喎。查實雷哥斯達咁老定又無他嘅，畢竟甘馬雷斯只係葡超中游貨色，今季聯賽兩度同賓菲加交鋒分別輸0:3、0:4，戰鬥力輸賓菲加成條街就梗o架嘞。再講，由於賓菲加已獲得來屆歐聯入場券，即係話甘馬雷斯就算輸波都肯定有份踢來屆歐霸盃，戰意同怨氣都肯定唔及連失兩盃嘅賓菲加好。

何況甘馬雷斯冇乜葡盃命，對上5次殺入決賽都係輸波收場，面對24屆盟主賓菲加想唔輸鑊勁嘅都難！

葡盃賽制：今場為決賽，於中立場奧爾拉斯國家球場舉行，如法定時間90分鐘內打和，將加時30分鐘，再未分勝負即互射12碼決勝。