傳媒叫弗賴堡咪嘥料

猪拉多纳

德國足總、列強首腦同傳媒賽前都因為德甲嘅歐洲排名而為史浩克打氣，今季德甲開展盛世，拜仁慕尼黑同多蒙特雙雙殺入歐聯決賽，不過歐洲聯賽排名計近五年，由於車路士啱啱捧咗歐霸盃，英超仍以些微積分壓住德甲，留喺西甲之後嘅歐洲第二聯賽，不過德國球壇上下對來季超越英超充滿信心，所以更希望史浩克能夠打歐聯。
冇歐洲排名 面臨星散

史浩克目前喺歐洲球會排名第15位，若然攞到參賽權，喺歐聯外圍賽將被列為種子，對手預期會易應付得多。相反弗賴堡近五年都未踢過歐洲賽，根本冇歐洲排名，抽籤時將會列入最低檔次，外圍賽隨時要硬撼AC米蘭、里昂、華倫西亞、阿仙奴或熱刺等勁旅，加上弗賴堡一眾主力最少已有麥斯古斯、真羅辛度、卡利古尼同富隆等確定離隊，來季勢必星散，又唔慌有錢擴軍，若然由佢哋取得第四名，相等於德甲浪費咗一個歐聯席位，賽前德國傳媒都齊聲表態，大家都希望來季史浩克踢歐聯，弗賴堡踢歐霸。