櫻花搶榜首飛砂劈石

猪拉多纳

今個周中又有日聯盃玩，B組二哥大阪櫻花主場對鳥棲砂岩，櫻花係今季日職唯一關西球隊，勢孤力弱，喺聯賽難發圍，唯有叠埋心水爭盃仔，佢哋今季喺聯賽盃多番強陣出擊，今次對住作客唔叻嘅鳥棲砂岩贏得，捧主勝！

（周三晚6時開賽）

隨住大阪飛腳同神戶勝利船降落日乙，大阪櫻花今季成為日職唯一一支關西代表，肩負振興關西足球嘅重任，壓力都幾大。論人腳佢哋唔曳，箭頭柿谷曜一朗有級數，相信出國搵食只係時間問題。櫻花仲有星級中場森比斯奧，呢個巴西球星曾經係意甲球隊巴勒莫主力，仲去過名牌球隊羅馬搵食，踢番八成水準都超晒班。大軍有實力，衰在唔穩定，難於聯賽爭冠。
砂岩作客勁曳

好多日職球隊視日聯盃為雞肋，但大阪櫻花今季打聯賽盃特別肉緊，明刀明槍主攻盃賽。根據賽制，分組賽頭兩位先可以出線，櫻花目前七分排第二，仲未穩陣，今戰都要繼續搏。至於鳥棲砂岩今季演出明顯跌咗watt，佢哋以往靠主場搵食，上仗主場對中游分子新潟天鵝輸埋，冇晒料到，呢班波作客仲曳，今季只係贏過大分三神，結合佢哋近兩次作客大阪櫻花全敗嘅劣勢，一於捧主Ｗ啦！