飛腳唔做賊做惡客

猪拉多纳

今季表現蠱惑到爆嘅大阪飛腳，終於有報應嘞，上場作客畀神戶勝利船o趙低，跌落日乙積分榜第3位，雖然聯賽仲有漫漫長路，但決意即刻打番上日職嘅佢哋，又點敢再玩嘢吖，今日响（日）1作客福岡黃蜂，飛腳應該可以開番個2.25倍「讓球客勝」。

飛腳今季以大超班人腳打日乙，踢咗13場只輸一場，主場仲保持不敗，齋睇表面演出好正氣。不過細心啲check吓，你就會發覺佢哋主場例牌讓波多，劑劑都贏波輸盤，有時仲索性和埋跣到啲捧場客攤攤腰，簡直係專門打劫擁躉嘅大賊。
鬥黃蜂前監督狂省家長

好彩，上場畀神戶o趙咗場2:0之後，飛腳畀長崎成功丸過埋頭，依家跌咗落第3位，即刻刺激到佢哋班人急謀振作對策，監督長谷川健太仲單獨捉咗前國腳家長昭博照肺，明顯係驚佢再沉落去。最好笑嘅係，兩日前佢哋嘅大營被「賊」光顧，有隻烏鴉飛咗入去啄開啲果凍開餐，搞到班球員啼笑皆非，知道做賊係件幾神憎鬼厭嘅事。由於飛腳唔敢再hea玩，而且今季作客多數出多兩錢力，今日佢哋作客福岡黃蜂，贏兩球問題唔大，尤其黃蜂件中場木原正和左膝傷咗，要抖3個禮拜，飛腳有本錢贏波反彈嘅。