巴塞打爆馬體會

猪拉多纳

Full Team作客等捧盃

巴塞季尾發波瘟兼傷兵纍纍，如果唔係上半季喺聯賽早早跑出，家陣分分鐘已經變成四大皆空嘅「地上最強雞胸隊」！佢哋今晚喺西甲作客馬德里體育會，由於只要獲勝就提早封王，所以連傷兵域陀華迪斯、艾比度都隨軍，相信巴塞為咗一吐烏氣，將會延續近季剋死對手嘅走勢贏波捧盃，「客W」有1.7倍，當然係小妹心水！

（now632周一凌晨1:00直播）
近5次對賽巴塞贏晒

地上最強變地上最頹，巴塞隆拿經歐聯大敗後，主將老化、過分依賴美斯等問題顯露無遺，加埋維蘭路華健康情況未明朗、多位主將都傳出離隊等負面消息下，今場梗係要把握機會贏波攞番個冠軍沖一沖喜啦！好彩嘅係佢哋今仗有柏度洛迪古斯復出，馬斯真蘭奴都復操有望上陣，Full Team作客等捧盃，對住近4戰主場只得1勝嘅馬體會，有力延續近5次對賽全勝嘅優勢，提早將西甲冠軍攞到手。

今季靠主場搵食嘅馬體會近排喺卡達朗球場嘅演出明顯下滑，對住皇蘇、華倫同埋皇馬全部都贏唔到，而且馬體會已經鎖定歐聯席位，下星期又要應付西班牙盃決賽，鬥心又邊會及得上想贏波拎冠軍嘅巴塞吖，睇怕今晚都要喺自己地頭戥人高興咯！