薩拉戈薩搏盡有雞偷

猪拉多纳

假波傳聞困擾利雲特

西甲獨腳戲由利雲特主場對薩拉戈薩，利雲特「正氣哥」巴卡路早前大爆隊友對拉科魯尼亞一戰造假，引起軒然大波，賽會話有足夠證據鋤死班壞分子，涉案球員肯定震過貓王，現時隊內氣氛極曳，將士無心戀戰，莊家開平手盤，擺明睇好護級心切嘅薩拉戈薩，平手盤撐薩軍！

（周六凌晨3時開賽）

西甲每逢季尾都會傳出有球隊「收錢送分」嘅傳聞，今次輪到利雲特做主角，最特別嘅情況係隊內球員巴卡路挺身而出指證隊友造假，確係好罕見。西班牙賽會總裁泰拔斯高調表示夠料「叉廚」涉案人士，但未有透露細節，利雲特突然成為「假球部隊」，邊有心情踢波吖！何況佢哋依家不愁降班，自二月初至今聯賽十三戰只贏一場，明顯等緊「收咧」。
薩軍二連捷氣勢佳

薩拉戈薩陣營氣氛完全唔同，佢哋戰至季尾專心為護級而戰，近期連贏兩場暫時逃離降班區，兩大進攻主力普斯迪加同艾邦奴喺關鍵時刻交到貨，演出對辦。大軍目前僅領先尾三嘅拉科魯尼亞一分，今戰即使有守將沙普拿路及中場莫維拿坐波監，仍要拚盡搶分。往績方面，薩拉戈薩近九次作客只一和八負，但鬥志堅可彌補不足。

中游球隊利雲特主場對護級分子薩拉戈薩，正路少少哋都要讓平半至半球啦，但今場莊家開出平手盤，薩拉戈薩仲要較低水，睇盤已有啟示，一於捧薩拉戈薩。