眾將等跳船冇心踢 QPR頂唔住廠仔

猪拉多纳

下季將會降班踢英冠嘅昆士柏流浪，今晚喺主場迎戰力爭前4嘅阿仙奴。QPR依家班球員個個忙住跳船，仲邊有心機踢波吖，相反阿仙奴發緊力爭前4，力保參戰歐聯機會，鬥心高下立見，兵工廠今仗隨時大炒一場，2.05倍「讓客」抵撐。

（有線200及300、廣東體育周日凌晨0:30直播）

昆士柏流浪季前積極擴軍，可惜大多數新兵都唔對辦，「踢波頭痕，出糧醒神」，好似挾上屆歐聯冠軍成員之名來投嘅前車路士右閘保辛華，喺上仗打和雷丁球會正式宣告降班後，佢竟然都仲笑得出，擺明冇將球會放喺心。若然佢肯踢番喺車仔嘅表現，QPR都唔會搞成咁啦！其餘新兵好似朴智星密謀過美職、翼鋒凱列特搵緊其他英超球會收留，真係「你有你降班，我有我忙碌。」
阿仙奴爆發爭前4

最搞笑喺冬季以救星身份來投嘅中堅基斯杜化森巴，接受《天空體育》訪問嗰陣，自爆1月轉會時自己其實未Ready，唔夠弗，連累球會真係唔好意思喎！至於有貨交嘅射手雷米、門神施薩索拉斯，都已經畀其他球會睇中等走人，肯唔肯搏命令人懷疑。新兵冇心踢，舊將雪到硬，今晚點頂得住兵工廠？

對手阿仙奴一到要爭前4嘅階段就嚟料，而且佢哋作客亦已經連贏4場，值得信賴。前鋒普多斯基、禾確特、中場路斯基輪住發炮，鋒力有保證，仲有呀，上場賽和曼聯後尹佩斯親自入去廠仔更衣室，鼓勵佢哋下屆一齊踢歐聯，在公在私都無理由衰畀前隊長睇，一於支持佢哋大勝一場啦！