松鼠抖夠「+1」搵着素

猪拉多纳

大宮松鼠成為日職當紅球隊，佢哋上周喺埼玉縣打吡砌低同市名牌球隊浦和紅鑽，保持跨季十八場不敗，創下日職紀錄，可謂雙重興奮！松鼠並冇畀勝利沖昏頭腦，本周中於聯賽盃留晒力，集中火力打日職創佳績，今日作客對住喺亞冠盃搏殘嘅柏雷素爾，受讓必捧「讓球客勝」！

（周五晚6時開賽）

一講起埼玉縣代表球會，唔使問阿貴，個個都話係浦和紅鑽，大宮松鼠長期畀同市大佬騎住，相當冇癮。不過，松鼠自上季尾全速發力，新季延續強勢，現已保持跨季十八場聯賽不敗，刷新日職紀錄，威水到不得了！松鼠教頭維迪尼克自知兵力有限，上場聯賽盃有心留力，對比起上周日職贏紅鑽一戰換咗七個人，前線斯洛文尼亞孖寶隆比真歷及路華高域尾段先落場，耗力唔多。

柏雷素爾周中就喺亞冠盃搏命，佢哋主場對貴州人和強陣和波提早出線。柏軍進攻中心李安度杜明基斯受傷患困擾，但近日已復操，今戰應可候命，有返呢個死球王在陣進攻威脅大好多，獨忌佢哋上場去得盡，班兵回唔切氣，對住弗爆嘅松鼠冇乜甜頭。睇埋往績，松鼠近三次聯賽作客柏軍兩勝一和，包括上季大勝4比1，嗰場射手隆比真歷連中三元，績靚又當弗，受讓梗係要捧場啦！
三箭周六反咬鯨魚

另一支日職亞冠代表廣島三箭就喺周末登場，佢哋晨早於亞冠盃出局，周中遠征烏茲別克鬥賓約哥派出大量副選，用上井波靖奈及野津田岳人等小將，王牌前鋒佐藤壽人更未有隨隊。三箭本周聯賽作客名古屋鯨魚先會打真軍，佢哋不嬲擅打反擊，今季聯賽作客三戰全勝，有力再次反客為主！

（周六下午1時開賽）