三箭復仇做細界

猪拉多纳

賓約哥土炮打攻冇火

亞冠盃踢到第五輪分組賽，G組烏茲別克代表賓約哥主場對日職大軍廣島三箭，賓約哥五年前大搞巴西革命失敗告終，近年踏踏實實重用土炮由頭做起，今屆踢落穩打穩紮，但佢哋踢法守強於攻，兩隊火力一般，呢場玩入球細最好！

(now 670周二晚9時直播)

賓約哥05年創會，至今未夠十年，成軍初期獲烏茲別克總統卡里莫夫個女古納拉撐腰，財大氣粗，08年斟過巴塞球星伊度奧，最後簽到巴西名將李華度，仲由巴西名宿薛高領軍，星味十足。不過，古納拉玩厭班波，近年已淡出，賓約哥頓失大水喉，試過被李華度高調追討欠薪，非常折墮。

如今賓約哥搞掂財務問題，決定還原基本步重用土炮，陣內再無李華度呢類天王巨星，兩大外援烏克蘭射手比斯卓亞同塞爾維亞中場巴拉錫都係實而不華之輩，大軍踢法硬橋硬馬，最叻穩守突擊，今屆分組賽四戰只失兩球，防守好硬淨。
首循環賓軍拆箭

廣島三箭掛住上季日職冠軍牌頭出戰亞冠盃，殊不知分組賽四戰過後得一分，真係醜死怪。三箭已經提前出局，不過，為免醜上加醜，相信唔會hea踢。查實呢班波都係守強於攻，首循環主場對賓約哥輸反擊，今次用番呢招報仇，贏唔贏到就唔知，但預期入波唔多。