橫濱神戶做「細」界

猪拉多纳

FC橫濱呢隊日乙波最近好煩，主場一直未開齋衰到排18位，已經辣慶咗班Fans，上場輸畀長崎成功丸更加發生擁躉衝入草地生事嘅鬧劇，今日佢哋响（日）9場波對住來訪嘅神戶勝利船，點都要打醒精神，贏唔到都唔好輸否則實爆發騷亂，呢場要1.62倍入球細保險啲。
推出精品氹Fans

FC橫濱其實同神戶一樣，季前被認為係爭升班嘅候補球隊，點知出閘脫腳，打咗個幾月聯賽只贏兩場，主場仲渣到2和2負，結果4日前佢哋响自己地頭1:2不敵長崎之後，前鋒田原豐仲同球迷嘈交，有3個擁躉嬲到走入球場抗議，有位仁兄慶過龍剝咗隻鞋掟橫濱啲職員，前日呢3個躁底Fans被重罰，其中兩個被禁入場8場，掟鞋嗰個直情被無限期禁制添。

見到班Fans咁扯火，橫濱今日都準備做啲嘢緩和吓，佢哋推出咗好多精品，包括要成九舊水港紙嘅波衫。但係要班球迷下火，最緊要仲係要踢得好，教練山口素弘就下令叫班人專心踢波，咪理場外嘅雜音，今場好有決心反彈。

問題在於橫濱係就係主場出擊，前鋒大久保哲哉亦連續兩場有波入，不過佢哋已經有6年時間未喺主場贏過神戶，何況對手近況勁弗，今場波守得和都還得神落，博佢開細好過。