慕遜加柏前線死火細盤格

猪拉多纳

德甲獨腳戲慕遜加柏主場對奧格斯堡，慕遜加柏雖然質高一皮，不過近期前線死晒火，就算主場出擊都信唔過，面對會搶分護級會主守嘅奧格斯堡，戰情相信會比較膠着，推介1.65倍細盤。

（有線64及203台周六凌晨2時30分直播）
奧格斯堡以穩為先

慕遜加柏上輪作客吞史特加兩蛋，再次暴露攻力疲弱問題，上屆德國足球先生馬高列奧斯離隊接近一季，教練法夫爾仍然無法彌補失去呢位大將嘅損失，球隊前線組織力不足，臨近季尾，陣中主力攻擊手艾蘭高同靴爾文狀態都明顯滑落，首席射手盧克迪莊係球隊近期入波最多嘅球員，但水準都極之平庸，既然前線冇貨交，法夫爾惟有先做好防務，佢哋近8場聯賽全開細盤，雖然佢哋主場硬淨，已保持8輪不敗，但近4次主場都只入一球，亦全數開細，今仗面對尾三嘅奧格斯堡，主Ｗ都有2倍分頭，足見佢哋攻力幾靠唔住。

奧格斯堡季尾搏盡搶分，近7場贏咗4場，目前雖然仲排尾三，但已拋離尾二賀芬咸3分，亦只落後尾4杜塞爾多夫3分，護級形勢唔算曳，佢哋進步源於防線，近6輪賽事有3場零失球，不過中場指揮官具滋哲繼續養傷，箭頭摩達斯腳風又嚴重欠順，已經連續6輪食齋，今場作客遇強隊料亦以穩為先。兩軍歷來喺德甲3度交鋒都開細盤，今場入波一樣唔慌多。