阿積士着火延續大屠殺

猪拉多纳

德甲拜仁慕尼黑所向披靡，荷甲勁旅阿積士於季尾亦打出超班氣勢！呢支傳統班霸近期上晒身，聯賽已經六連勝，上仗作客燕豪芬都如入無人之境怒轟三粒，今輪主場迎戰海倫芬又有排入。海倫芬近年對親阿積士都大手交易，咁好路阿King梗係追大啦！

（now 639周六凌晨2時直播）

在法蘭迪保亞帶領下，阿積士愈打愈順，雖然燕豪芬、飛燕諾甚至維迪斯咄咄進迫，但佢哋驚都未驚過，由三月頭起連贏六場聯賽，其中五場自己都轟入三粒或以上，上場作客燕豪芬以為會遇到麻煩，點知成場佔盡優勢，三度領先下勝三比二，贏得非常有說服力。阿積士依家遇神殺神，海倫芬要失少粒都難。海軍目前排第七，但來屆歐霸盃席位仲未穩陣，而且球隊失球數字比唔少下游球隊仲要多，打死守唔係佢哋嗰瓣，今場又會上演入球騷。
里昂馬略卡撐得過

法甲蒙彼利埃主場對里昂，蒙軍上場後防唔慌唔「懵」，開波早早畀對手入三粒，主場讓唔起里昂，捧「讓球客勝」。西甲馬略卡主場鬥華歷簡奴，華軍依家大打風流波，相反馬軍要搶分護級，捧主Ｗ。