利伯泰迪細玩堤格雷

猪拉多纳

一分夠數 睇定嚟食

南美由自盃B組最後一輪賽事，巴拉圭球隊利伯泰迪主場對阿根廷球會堤格雷，利伯泰迪近年屬自由盃八強常客，經驗豐富，收放自如，今場佢哋不敗即可晉級，唔係一定要贏，主勝偏熱唔抵玩。堤格雷上年喺南美球會盃決賽被保安毆打，棄權失冠，轉戰自由盃無復神勇表現，客場兩戰冇士哥，鋒力太弱，呢場玩入球細最好！

（周五早上6時45分開賽）

巴拉圭勁旅利伯泰迪近年枕住有得踢自由盃，對上三年同樣八強止步，呢班波屬南美二線球隊，打自由盃分組賽完全冇問題，去到淘汰賽就窄窄哋喇，今季目標明確，不求奪冠，但最低限度要突破分組賽。睇番B組形勢，榜首彭美拉斯肯定出線，利伯泰迪霸住二哥位置領先堤格雷兩分，今場唔輸即可晉級。利伯泰迪上次主場輸波已係上年五月，之後保持廿一場不敗，不過，佢哋今戰唔係非勝不可，讓波唔抵玩。
堤格雷作客未驚完

另一邊廂，堤格雷上年於南美球會盃異軍突起殺入決賽，十二月作客聖保羅出現奇情場面，堤格雷球員報稱喺半場期間被主隊保安毒打，仲畀人用槍指嚇，成班球員又驚又嬲，決定罷踢抗議，最終被判輸失冠，情況都幾罕見。事隔唔夠半年，堤格雷轉戰自由盃，主場三戰兩勝發揮唔差，但客場兩戰同樣輸○比二，唔知係咪陰影未除，今次形勢上雖然要贏波先可晉級，但睇怕佢哋都係咬唔入對手，玩細好過！
賽制：

現為分組賽階段，32隊分8組，每組4隊，採雙循環制，每組首名及次名晉級。分組賽出現同分，將順序以下列方法定名次：

1.分組賽中總球差　

2.分組賽中總入球數

3.作客入球　

4.抽籤