法總聖伊天冇氣「細」

猪拉多纳

前晚場英總曼城對車仔快上快落，係近年少有嘅精彩好波，但係今晚場（二）20法國足總盃聖伊天主場對羅連安特，大家就唔好抱乜嘢期望嘞，事關聖伊天就算Win得出，恐怕都未必係大勝，1.8倍入球細仲抵玩過1.7倍W。
教頭講明留力法聯盃

足智彩開嗰個1.7倍聖伊天主勝，比起好多同行都低，理論上喺呢場一場過決勝嘅8強大戰佔上風，問題係佢哋往績好不利，近6次主場對羅連安特，只得2勝4負，而且教頭加迪亞講到明，今場波佢會玩吓輪換，上星期六聯賽打和華倫西恩斯0:0班主力入面，有幾件會抽起，備戰嚟緊個星期日對雷恩嗰場法聯盃決賽。後顧有憂，就算聖伊天近8場波4勝4和未輸過，狀態好過遇強必瓜嘅羅連安特，但點都係捧唔落手。

往績佔優嘅羅連安特，近排有個毛病係遇強，或者同級對手唔識贏，只係恰到啲排名低過佢嘅球隊，仲要偶然會失手。就攞最近8場波去計，排名第8嘅佢哋，輸畀里爾（第6）、里昂（第3）、和波爾多（第9），好難畀到人信心，除咗往績着數，佢哋叫做蝕唔晒嘅地方，就係今季响法聯盃主場和過聖伊天1:1，反映出响盃賽大家都收收埋埋，完全係一場五五波，只不過班二線兵識唔識入波，就好難講咯。