拉素祖記「細」均力敵

猪拉多纳

兩支歐戰失意大軍拉素同祖雲達斯今晚會喺意甲碰頭，咁嘅戲碼本應係一場精彩大戰，點知主場出擊嘅「藍鷹」畀傷停問題搞到半隊主力唔踢得，至於「老婦人」亦有鋒線大將基奧雲高倦勤，況且大戰過後兵疲力弱，又點會多波入吖？1.75倍入球細就夠穩陣喇！

（開賽時間：周二凌晨2:45）
兩軍發電機非傷即停

講真吖，小妹原本以為「祖記」喺歐聯8強大戰拜仁慕尼黑會相當精彩，點知兩回合夾埋居然畀呢支德甲冠軍大炒4蛋，打擊都咪話唔細！「斑馬軍團」咁樣畀人撳住砌，班主力當然元氣大傷啦，家陣仲要有火力泉源之一嘅基奧雲高有傷，入波不嬲一球起、兩球止嘅佢哋，更加唔使旨意多波入啦。

至於主隊拉素嘅情況就更差，佢哋畀費倫巴治踢出歐霸後，有中場布洛治同鴨都拉干高等主力養傷要抖，想射穿客軍條全意甲最堅防線可以話係難上加難，加埋般奴彭利連拿同魯歷等5個後衞非傷即停，班中前場球員又點會放膽上去攻？話就話「祖記」中堅基亞連尼唔出得，但有連拉素名宿佩利斯都盛讚嘅比路素頂上，拉素想入番球都難，睇嚟球迷都係無緣睇入球騷喇。