彭美拉斯貪勝不知輸要反

猪拉多纳

雖然話今仗贏波就出線，但新季要降落巴乙嘅彭美拉斯，聽朝喺自由盃B組主場對巴拉圭勁旅利伯泰迪，唔係話贏就贏o架，特別係佢哋今仗會改打3後衞陣式諗住增強鋒力，隨時貪勝不知輸，要讓波力奇寧願捧1.78倍「讓客」好過。

（開賽時間：周五早上6:15）
打3後衞對利伯泰迪冇着數

經過尋日朝堤格雷主場擊敗士砵亭水晶後，B組目前形勢混亂，4隊波都仲有出線機會，當中彭美拉斯聽朝只要贏波就可確保入16強，但同時排喺榜首嘅利伯泰迪，更係和波都掂，唔通人哋會放軟手腳咩？再者，新球季要降落巴乙嘅彭美拉斯，論實力其實只係一般，之前小組賽4戰2勝2負，最慘係佢哋個前鋒新星卡奧丹尼路因為大腿傷，今仗上陣成疑，或要由啱啱傷愈嘅基巴拉奧頂上，後者狀態未足，又可以寄望幾多？

仲有，彭美拉斯主帥基連拿為咗想實現提早出線目標，據聞今仗會改打3後衞陣式，希望以攻代守搞掂對手，但呢招隨時益咗利伯泰迪打反擊。更何況彭美拉斯今仗會有防線主力韋臣停賽，就算隊長軒歷基阿祖安奴可以及時回歸鎮守防線，都一樣有隱憂o架！