東京肉緊盃仔唔赦櫻花

猪拉多纳

今日有六場日聯盃賽事上演，其中B組的大阪櫻花近期戰績平平，今仗更要面對一向應付盃賽態度認真的FC東京，縱有主場之利亦未必能擊倒後者，櫻花讓波信唔過，捧FC東京「讓球客勝」。

（周三晚6時開賽）
櫻花射手柿谷斷纜

大阪櫻花於分組賽暫時取得一勝一和一負的成績，但球隊對上三場賽事只錄得一和二負，狀態明顯有所回落。櫻花今仗雖有後防山下達也停賽期滿復出，但球隊主力射手柿谷曜一朗連續四場有波入的紀錄於上仗作客不敵鹿島鹿角時「斷纜」，對球隊攻力或多或少有所影響，今仗縱有主場之利亦必惡得出。

FC東京暫於分組賽取得一勝二和的成績，球隊對待盃賽的態度非常認真，上仗聯賽面對近期狀態甚勇的大宮松鼠最終輸波，不排除係留力應付今仗日聯盃賽事。FC東京今仗雖有部分球員因傷無法上陣，但球隊仍有不少好手在陣，加上最近兩次於日皇盃和日聯盃作客櫻花皆贏波而回，可見球隊踢盃賽特別醒神，今仗一於捧FC東京「讓球客勝」。