波士親臨督師 羅馬圍剿拉素

猪拉多纳

羅馬同拉素唔單止係同市宿敵，家陣大家仲要為來屆歐洲賽入場券爭餐懵，今晚呢場意甲「首都打吡」肯定打甩髀。羅馬近況回勇，今仗仲有老闆占士柏洛達專程由美國飛嚟睇波，成班手足肯定會打醒十二分精神做齣好戲，一於撐羅馬砌低甩皮甩骨嘅拉素，捧1.85倍主勝。

（開賽時間：周二凌晨2:45）
柏路達勁擦鞋要贏打吡

最近羅馬重返正軌，對上6場聯賽贏咗4場，雖然話艾雲皮里斯同奧斯華度今晚坐波監，前鋒迪斯度剛啱傷愈，但係以拉美拿同托迪為首嘅鋒線一樣火力十足，呢對老嫩組合由2月至今8場意甲合力炮製咗7個「士哥」，當中托迪年屆36歲都仲咁Fit，怪唔之得有球迷都要求柏蘭迪利重召「王子」入意大利國家隊啦！

最重要係羅馬嘅美國會長占士柏洛達今仗專程由波士頓飛返羅馬睇波，中場柏路達就認真世界仔，前日受訪時話要揚威「首都打吡」，送份禮物畀老闆喎！柏路達擦鞋擦到出晒面，老闆嚟到，班手足肯定搏到盡交貨。
「藍鷹」傷兵滿營

係，近3次「首都打吡」都係拉素贏，之不過以佢哋嘅薄弱班底，要兼顧意甲、意盃同歐霸盃3條戰線都咪話唔吃力。上個禮拜五先至喺歐霸盃8強首回合淨吞費倫巴治兩蛋嘅「藍鷹」，目前有前鋒費路卡利、中場布洛治、守將鴨都拉干高、史坦基域斯同安德里戴亞斯養緊傷，就連老牌射手高路斯都話狀態不足未必踢，隻「鷹」殘成咁點同「雌狼」砌呀？