ＰＳＧ主場唔赦地上最強

猪拉多纳

今晚歐聯8強戰有「地上最強」之稱嘅巴塞隆拿出場，球隊將會作客面對法甲豪門巴黎聖日耳門（ＰＳＧ），究竟係巴塞永遠打不死，定係有錢使得鬼推磨呢？我就相信後者嘞，今晚首回合ＰＳＧ頂到個不敗都唔出奇！今場比賽一定座無虛席，ＰＳＧ表示有70萬球迷申請買飛，超額認購好多好多倍喎！

巴塞上圈對AC米蘭都係先踢作客，食完兩隻光蛋後返主場先收復失地，今晚作客同樣唔易踢嘅ＰＳＧ， 街外好多盤都讓到半一，但見過鬼仲唔怕黑咩？上盤都係唔好掂啦！巴塞上周聯賽喺佐迪艾巴及沙維缺陣下，最終被切爾達逼和2比2，美斯連續第19場聯賽有波入都冇用。今晚呢兩位球員雖然可以復出，但柏度洛迪古斯要停賽，中堅佩奧爾亦未傷愈，陣容仲未去到「夫添」，上盤點買得落手呀！
法甲豪門步入收成期

自卡塔爾財團前年入主ＰＳＧ後，已經計劃5年內要贏歐聯，球隊高價購入伊巴謙莫域、拿維斯及堤亞高施華等球星去堆砌星級陣容，今季可謂成功進入收成期，大有機會奪取法甲冠軍，而歐聯亦順利殺入8強。ＰＳＧ喺有料教頭安察洛堤嘅帶領下，上圈面對另一支西甲球隊華倫西亞，首回合作客技術性擊倒對手，返主場則「揸流攤」和波出線，可見呢支億萬大軍絕對有能力同西甲球隊抗衡。

ＰＳＧ主力射手伊巴謙莫域停賽期獲減刑今場可倒戈上陣，佢喺聯賽已轟入25球腳風非常順，配合有5個歐聯入球嘅另一射手拿維斯，今仗可以強陣出擊，ＰＳＧ下盤可期！

（有線61及64台周三凌晨2時45分直播）
Wendy推介：巴黎聖日耳門（下盤）