鄭雨滇起孖醒神

猪拉多纳

本地薑鄭雨滇尋日原本騎伍碧權嘅「醒目波幅」爭連捷，點知呢隻馬排位後退出，但似乎冇影響阿滇嘅搏殺心情，甫開場就靠「醒少少」同埋「奇無極」梅開二度，兼且包辦第一口孖寶，派彩有$771.5，認真和味。
       
醒少少左穿右插後上取勝，人馬發揮一流。
何良拍阿滇今季首Ｗ

何良同鄭雨滇上季攜手擸咗四W，成功率都唔低，但今季呢對騎練合作嘅成績就麻麻，直到尋日先至靠「醒少少」贏到季內合作首Ｗ。雖然只係一場五班頭馬，但良哥賽後就好開心，事關佢話幫呢啲難攪嘅馬開齋特別有滿足感。
       
何良（中）、鄭雨滇（左二）與馬主展現滿意笑容。

至於「醒少少」，良哥覺得呢隻馬本身遲熟啲，以前體質又弱，狀態一直操唔起，直到上場入圍後，晨課表現好咗好多，所以今次跑二千米抽外檔，佢都唔太擔心，反而專心留前鬥後效果仲好，結果末段一攻而破，恃輕磅之利打開勝門。