維帥回歸巴塞攞威

猪拉多纳

巴塞隆拿主帥維蘭路華養病超過3個月，今周終於正式回歸！「地上最強」今晚喺聯賽造訪尾二嘅切爾達，就算沙維同恩尼斯達休戰，誓要入波平C朗「西甲全滿貫」紀錄嘅美斯肯定唔會手下留情，當然捧1.8倍「讓客」啦！

（now632台周日凌晨1:00直播）
美斯爭入波挑戰西甲全滿貫

主帥維蘭路華日前正式復工，雖然未知會唔會隨隊作客，但好似基斯甸泰路話齋，教練現身已經令士氣提升唔少喇！就算域陀華迪斯停賽，仲有沙維同恩尼斯達會被收起，留力踢對巴黎聖日耳門場嘅歐聯8強戰，不過今次對手只係近11場得1勝嘅切爾達，巴塞出副選都夠炒啦。

仲有，美斯只要喺今場射穿對手大門，就可以追平C朗單季攻破晒19隊西甲敵軍嘅紀錄，為咗完成「西甲全滿貫」唔畀死敵專美，啱啱喺高原惡鬥玻利維亞踢到嘔嘅「球王」有假都唔放，一返西班牙就聯同成班隊友返訓練場做恢復性練習，務求以弗爆狀態示人，要入波達成「西甲全滿貫」，並將聯賽連續入球紀錄擴至19場，根本難唔倒佢！