首飾孖寶卡士高

猪拉多纳

　　明晚八場泥地賽將於沙田馬場舉行，切勿入錯場。今季練馬師之間鬥爭激烈，蔡東方葉四廐，只是相差幾場頭馬，雖然暫時仍是蔡約翰居榜首，但形勢隨時會變。蔡約翰一向有神仙美譽，然而多季以來，甚少在泥地獲勝，難道神仙在泥地使不出法力？當然不是，單睇今季此廐有二十三次安排馬匹跑泥地賽，十一次入三甲，就知蔡廐泥地馬並非唔得，只是較少在此場地出賽而已。然而，明晚練者卻一反常態大舉出擊，必有圖謀。

　　第一口孖T頭關二班1650米，蔡廐「首飾孖寶」前仗評81分初跑泥地，兼且出爭從未跑過的大長途1800米，竟可於全程外叠下跑獲第五，其實唔簡單。再睇同場對手「開心至愛」及後兩仗獲冠亞各一，「香檳歲月」再出獲亞，足證賽事水平不俗。儘管「首飾孖寶」上仗轉回田草1400米被技術性擊倒，但泥地賽向來低半班，今次回到此場地跑回1650米，憑其卡士有力贏馬。

　　尾關四班1200米，再揀蔡廐「千軍萬馬」，此駒於去年12月中在泥地1200米獲季後，其後三仗都被安排出爭草地賽事，未能入三甲屬正常。然而上仗跑谷草1200米，遇超慢步速卻可後上追入第五，足證當銳，落班即轉攻泥地，志在必得。洋超