巴塞回勇打爆「鐵甲」簡奴

猪拉多纳

連AC米蘭呢個難關都闖得過，區區一隊華歷簡奴又點攔得住巴塞隆拿？重振「地上最強」雄風嘅巴塞，近季對親華歷簡奴都炒鑊勁，今晚雙方喺魯營交手，預計戰況應該幾慘烈。更何況華歷簡奴受傷停問題困擾搞到甩皮甩骨，就算鐵甲奇俠「上埋身」，睇怕都難逃大敗厄運，一於捧「-2」嘅1.7倍「讓主」。

（now632台周一凌晨4:00直播）
佩奧爾傷右膝或提早收咧

巴塞上周憑美斯梅開二度大炒AC米蘭4蛋，逆轉殺入歐聯8強打起晒士氣同鬥志，雖然佢哋有沙維倦勤兼門將域陀華迪斯停賽，《世界體育報》尋日仲報道隊長佩奧爾右膝關節做咗內窺鏡手術，至少要抖1個月甚至提早收咧，唔淨止今晚唔使預，下個月頭兩鬥巴黎聖日耳門嘅歐聯8強賽事都唔出得，之不過即使上述3位主將缺陣，巴塞點秤都高華歷簡奴幾班啦！
華歷簡奴心口賣電影廣告

睇番往績，華歷簡奴近4次交手次次輸鑊勁，共失19球兼且連蛋都破唔到，擺明畀巴塞食到應一應。會方同迪士尼公司傾掂數，今場波衫胸前贊助商會開始幫4月底上畫嘅《鐵甲奇俠3》賣廣告，會長比沙仲話希望《鐵甲奇俠》可以為隊波帶嚟好運喎！喂，你哋過去13次去魯營輸足10次，今仗除咗守將拉巴卡倦勤外，又有前鋒巴迪斯奧達、中場查維富亞高同後衞卡沙度坐波監，個陣殘成咁，羅拔唐尼落埋場都幫你哋唔到啦！