愛曼戰決定莫耶斯去留

猪拉多纳

「冇難度，有態度！」呢幾晚一打開電視就會聽到呢句對白，愈聽就愈順耳，家陣莫耶斯會唔會捨棄愛華頓走人，就睇班球員嘅比賽態度喇！

早幾晚專登捧老友鄭兆聰場，入場睇傑志喺亞協盃作客新加坡武裝部隊，上半場先失兩球以為冇運行啦，但「聰哥」喺更衣室教路後，班傑志手足一落到場就「冇難度，有態度！」連入4粒反勝，可見教練嘅領軍功力，真係可以化腐朽為神奇o架。
足總盃出局 考慮走人

愛華頓喺足總盃輸畀韋根輸得勁肉酸，搞到教咗隊波11年嘅莫耶斯好冇癮，唔單止對球員表現極度失望，仲語重心長咁話諗緊季尾約滿之後走唔走人，依家淨係會諗點踢好最後嗰幾輪英超喎。

講真，「拖肥糖」能夠喺英超企得咁穩陣，莫耶斯實在係居功至偉，球會又點會捨得佢走吖，依家只係爭在班球員可唔可以「有態度」，今晚佢哋喺主場迎戰曼城，分分鐘係莫帥下季仲教唔教嘅分水嶺！