聖保羅開大冇「蘭」度

猪拉多纳

新箭頭拍心口有波入

南美自由盃分組賽聽朝有好戲上演，沙蘭迪兵工廠喺C組主場對聖保羅，不如揀個2.1倍入球大。雖然聖保羅有射手路爾斯法比安奴停賽，不過新加盟嘅艾萊斯奧話，有得踢正前鋒開正佢嗰瓣，信得佢過玩入球大最好。（開賽時間：周五早上8:30）

現時聖保羅喺分組賽得1勝1和1負，而且上場分組賽以1:1打和沙蘭迪兵工廠，射手路爾斯法比安奴唔生性被逐，今場要坐波監。不過，上年加盟嘅中場甘素覺得，現時聖保羅夠晒人用，法比安奴坐波監唔會造成毀滅性影響。
沙蘭迪兵工廠少食白果

除此之外，新簽入嘅前鋒艾萊斯奧拍心口話，自己有本事幫聖保羅數胡，事實上，上季佢以外借身份効力費古倫斯，個人攻入14個聯賽入球，賽前佢同記者講，本身最鍾意打正箭頭，呢場法比安奴停賽，其實更有利佢爭取入波。

聖保羅踢完3輪賽事後，只係領先第3位嘅強者1分，為咗爭出線，相信佢哋唔會再玩嘢，就算作客都會以3分為目標，何況沙蘭迪兵工廠都唔係好蝦，佢哋近8場聯賽得1場冇波入，前鋒施拉邦同尼古拉斯阿古利受傷，明顯影響唔大，有本錢開入球騷。

南美自由盃C組
自由盃賽制

32支球隊分8組進行小組雙循環賽，每組首、次名躋身淘汰賽。