地震啞晒火讓唔起紅牛

猪拉多纳

聽朝美職壓軸戲碼，聖荷西地震坐鎮主場迎戰紐約紅牛，主隊喺聯賽開咧冇耐經已傷兵成籮，靠班二打六落場搏殺，演出隨時震過貓王，加埋射波冇腳準嘅雲度路斯基擔正攻堅，梗係撐一撻即着嘅紅牛，1.8倍「讓客」筍到爆！

（開賽時間：周一早上10:00）
雲度路斯基7次埋門冇球中

地震嗰個傷兵名單真係水蛇春咁長，除咗中場馬雲查維斯同後衞拜達斯侯亞兩件鐵膽主力，原本夥拍箭頭雲度路斯基搵食嘅阿倫哥頓同連赫特仲養緊傷，就連副選前鋒富薛圖喺上場都拉傷埋，搞到要殘陣應戰不特止，雲度路斯基亦要喺前線孤軍作戰。

最慘係連雲度路斯基都啞埋火，呢位上季美職神射手上場對鹽湖城7次埋門冇球中，賽後仲畀傳媒以「雲度路斯基盡得機會，入波盡歸鹽湖城」嚟腰膶，咁嘅表現又點撐得落。

相反，紅牛上場作客波特蘭伐木者，雖然喺尾段衰唔集中兼擺烏龍被逼和3:3，但係今場遇着唔識入波嘅地震使乜驚喎，起碼艾斯賓杜拿同亨利呢對前線拍檔火力有保證，仲有得受讓梗係要撐！