熱刺唔怕紅軍

猪拉多纳

阿占最Like加里夫巴利

英格蘭足球先生前哨戰今晚爆發！今屆英超巨星眾多，嚟到季尾好多人都講緊邊個先係No.1，今晚就有阿占兩大心水對決，由蘇亞雷斯帶領嘅利物浦會喺主場迎戰由加里夫巴利領軍嘅熱刺，肯定好睇過戲！熱刺近期氣勢如虹，論整體實力更勝「紅軍」，今場熱刺受讓半一，梗撐1.8倍「下盤」。

（有線200、204及300周一凌晨0:00直播）
連續5場入波創熱刺紀錄

講到英格蘭足球先生，其實好多球星都有資格問鼎，好似曼城嘅大衞施華、車路士嘅桑馬達、阿仙奴嘅辛迪卡索拉、愛華頓嘅費蘭尼，甚至係史雲斯射手米捷今季都係長時間保持到好表現，不過曼聯箭頭尹佩斯、利物浦嘅蘇亞雷斯同熱刺快翼加里夫巴利始終係3大熱門，當中阿占最Like就係加里夫巴利。

熱刺依家可以打入聯賽三甲位置，加里夫巴利嘅功勞真係非常之大，佢連續5場英超入波已經創咗熱刺嘅球會紀錄，難怪連皇家馬德里都話想簽佢返嚟啦！事實上呢位威爾斯國腳嘅爆發力、腳頭同技術都非常全面，的確同C朗拿度有幾分相似，以熱刺嘅雄厚班底，要保住前四甚至前三唔難，今場至少有分落內袋。
利物浦蘇亞雷斯獨力難支

利物浦同熱刺差唔多，都係靠蘇亞雷斯一個人擔起成頭家，呢位烏拉圭射手往往可以憑一己之力扭轉乾坤，論個人表現的確拍得住加里夫巴利，可惜佢班隊友表現較為飄忽，而且史達寧、史杜列治等全部都係新拍檔，唔似加里夫巴利同艾朗連儂、迪科爾等夾咗咁多年，獨力難支，今場要熱刺「下盤」穩陣。當然要提醒埋大家，HD203台同時會提供3D直播o架！
頂占筍盤：熱刺（下盤）