射手弗爆 水晶宮攻陷侯城

猪拉多纳

今晚英冠爆發升班關鍵戰，由水晶宮坐鎮主場迎戰「老虎」侯城，主隊今季喺自己地頭勢如破竹，「超級殺手」格連梅利又狀態弗爆，難怪主隊教頭荷路維都對升上英超充滿信心啦，今仗絕對搞得掂作客麻麻嘅侯城，讓平半當然捧上盤！

（開賽時間：周三凌晨4:00）

水晶宮早排陷入低潮，聯賽作客嘅不勝走勢一度去到9場，對爭取直接升班構成沉重打擊，好彩佢哋上仗造訪打比郡終於贏波，信心即刻返晒嚟啦，今場面對最大競爭對手之一嘅侯城都冇有怕，皆因水晶宮今季所有主場賽事，自開咧戰後1場都未輸過，面對近6仗作客只係贏過米禾爾嘅侯城，又使乜驚先？
侯城首席射手提早收咧

最緊要嘅係水晶宮有今季勁入27粒嘅格連梅利壓陣，呢位王牌前鋒家陣喺英冠射手榜遙遙領先，而且佢近3次主場都有進帳，一共入咗5球，有咁嘅猛將在手，唔怪得領隊荷路維都勁牙擦叫球迷放長雙眼睇，話水晶宮肯定升到班咁話！相反，侯城嘅首席射手艾奴高就因傷提早收咧，要靠晒效率唔高嘅積森遜頂住，「老虎」變咗病貓，想搶分都難喇。