紅鑽「廣島力量」強勁開咧「箭」無不勝

猪拉多纳

日職揭幕戰連續兩年由廣島三箭主場對浦和紅鑽，當然夠晒話題。雖然上季三箭以1:0勝出，但紅鑽係東瀛記者選出嘅冠軍熱門票王，教練柏度域嘅「廣島化」計劃又已經完成，呢場再次領軍倒戈，受讓平半有望開下盤！

（有線148、now711台周六下午1:00直播）
日記者票選冠軍：浦和大熱

三箭嘅日職神射手兼MVP佐藤壽人，上星期喺日超盃又有波入，證明狀態依然出色。不過咁，今季三箭冇為亞冠盃特別增兵，後備力量依然非常薄弱，周中嘅亞冠盃分組賽主場對賓約哥淨吞兩蛋，隨時更加難回氣，唔通真係嗌30歲嘅佐藤壽人場場搏足120%咩？開季冇耐就要一星期連踢3場波，好難啃㗎！

另一方面，紅鑽今季簽咗唔少人，包括後衞森協良太埋堆，佢同紅鑽嘅中場柏木陽介及中堅槙野智章，以往一齊効力三箭係超級死黨，依家佢過埋檔，相信紅鑽嘅「廣島力量」會更得人驚。兼且教頭柏度域熟晒三箭路，紅鑽又以3.85分成為日本記者眼中冠軍熱門，相反廣島評分係4.8分排第3位（得分愈低愈被睇好），大家識揀啦！