天鵝捧盃P開唔停 升呢喜鵲乘機偷雞

猪拉多纳

打開門口做生意預咗一節淡三墟，踢波都一樣，史雲斯剛啱捧走英格蘭聯賽盃，球員搏晒老命創造歷史後，又唔愁有護級威脅，梗係狂歡慶祝，咁就益晒紐卡素乘機作客偷雞嘞。
紐卡素法國新兵有料到

對於史雲斯呢啲兄弟班嚟講，聯賽盃冠軍就相當於歐聯冠軍，係「至高無上」嘅榮耀。為咗留力決賽砌低巴拉福特，可以換晒所有主力搞到慘敗畀利物浦，依家捧盃當然盡情釋放壓力，所以球員都唔嫌老細孤寒畀雞碎咁多獎金，一於照開懷暢飲！

其實呢隊「天鵝兵」係變咗質嘅威爾斯球會，由最初升上英超用威爾斯球員做主力，到依家變成以英格蘭球員為主，丹麥領隊米高盧特立明白要喺英超企穩陣腳，就冇得揀飲擇食。不過家陣盃都捧埋，超額完成任務，就吊頸都要抖吓氣！

紐卡素招兵買馬護級有料到，尤其係幾個法國新援提升整體實力，增強防線穩定性，後防少咗甩漏，中前場自然就放心進攻，「喜鵲」嘅實力拍得住「天鵝」，呢場有得砌！