車仔點炒西布朗?

猪拉多纳

賓帥乞人憎 自己友都唔撐

英超車路士主場對西布朗，近期「藍戰士」可謂問題多多，當地唔少車迷都非常唔Like領隊賓尼迪斯，仲話要加強力度聲討佢添！雖然球員以及賓尼迪斯都話，球迷意見唔會影響球隊發揮，但其實球員都係人，話一啲影響都冇就呃你嘅。今晚對住近況回勇嘅西布朗，車路士就算主場出擊優勢都唔明顯，能夠小勝都已經收貨，度士推介個細盤畀大家。

（有線301及201周六晚11時直播）
球迷預告 地獄式聲討

自從賓尼迪斯上任後，其實車路士並未見有乜突飛猛進，同之前由迪馬堤奧「揸弗」時都係差唔多。相反喺人際關係方面賓尼迪斯似乎就唔係做得咁好，除咗車迷不滿佢之外，亦曾傳出球員同賓帥有過「拗撬」。度士唔敢講所有報道都係百分百準確，但亦相信並非個個車仔球員都聽晒佢支笛。足球與其他個人化運動唔同，教練團隊球員之間唔能夠相互合作，就好難攞到好成績。
近況勇 連贏紅軍黑貓

最大問題係，賓帥前日喺足總盃淘汰米杜士堡後，無啦啦發炮狂轟老細阿布及球迷，雖然球會發聲明話會繼續留用佢到季尾，但據聞當地車迷講到明，今仗會喺史丹福橋球場「地獄式」聲討賓尼迪斯，其實某程度上亦會影響落場球員發揮。

西布朗低潮已過，最近兩場先後擊敗利物浦及新特蘭，食住呢個強勢，今場絕對有能力同車路士周旋到底。單計人腳車路士一定喺西布朗之上，但受到更衣室內不良氣氛影響，今場大炒對手嘅可能性唔大，細盤係最佳選擇。