夏利叔 費Sir鬥奸鬥諗計

猪拉多纳

今季曼聯有機會做「3冠王」，難怪7月先訪港，但2月已經掀起撲飛狂潮啦！不過「紅魔」今晚嘅對手昆士柏亦唔遜色，喺冬季轉會窗開水喉博護級，兩軍名帥夏利叔同費格遜喺場外鬥諗計，分分鐘好睇過場內球員嘅表現！

曼聯喺英超拋離曼城12分，歐聯作客和皇馬，足總盃又入埋8強，難怪費爵爺好牙擦咁話，依家嘅曼聯勁過99年「3冠王」時代啦，薑始終係老嘅辣，費Sir今季經常輪換，又成日提班球員唔好睇小對手，所以近排「紅魔」面對弱旅都唔敢喪攻，但求穩陣贏波、保留體力就算。

計埋冬季轉會窗，昆士柏今季總共買咗17個人，老細咁大手筆，梗係希望護級成功啦，夏利列納出晒名係老狐狸，手上有咁多靚牌任佢玩，難怪可以喺主場悶和曼城、車仔、熱刺同愛華頓，即管睇吓呢位名帥，今晚又會用咩招數去對付曼聯啦！