列斯聯玩殘黑池新帥恩斯

猪拉多纳

列斯聯今晚喺英冠主場迎戰黑池，雖然客軍事隔個多月後終於敲定恩斯為新帥，但呢位前曼聯及利物浦球星領軍往績確實麻麻，列斯聯讓平半當然捧上盤。

（開賽時間：周四凌晨3:45）

恩斯周一晚正式與黑池簽下1年短約，唔少評論都認為佢領軍後，就可以同隊中首席射手、亦即係佢囝囝湯馬士恩斯拍住上爭取佳績，但唔好忘記恩斯喺2010年接手諾士郡期間，就曾經創下破球會紀錄嘅9連敗劣績，被炒魷後就「量地」至今，過往佢執教布力般流浪又冇好結果，證明佢領軍唔多掂檔，難怪黑池搵佢揸旗之後，就即刻畀死敵普雷斯頓嘅球迷喺網上喪寸。

列斯聯雖然連續4場輸波，但睇番佢哋近6次主場都取得4勝1和1負，證明喺自己地頭出戰有番咁上下威力，相信上仗喺足總盃遭曼城大炒後，今次會做番齣好戲挽回粉絲信心，就算主力前鋒比治奧已經轉投諾域治，但有擊敗熱刺嘅入球功臣羅斯麥哥馬克同華尼兩個，絕對夠力撐起隊波。