梁定華霍勵賢共創首Ｗ

猪拉多纳

梁定華同霍勵賢呢對騎練最近加強合作，但之前搏來搏去都係差少少，佢地先前合作嘅「甜情蜜意」喺快活谷一哩同葉楚航隻「自成一格」鬥足大半條直路，叮噹馬頭，最後輸條頸飲恨跑第二，不過佢地再接再厲，終於喺尋日年初八賽事取得合作以來首Ｗ，就係佢地頭場合作果隻「共創良機」後上贏馬，爆出17倍冷門，總算苦盡甘來。
       
共創良機爆冷開齋，霍勵賢與梁定華握手道賀。
賽前試閘教曉留力

賽後華哥對呢匹馬有期望，佢話今次安排「共創良機」轉場跑，加上換咗霍勵賢操刀，俾啲新鮮感隻馬，仲有賽前安排試咗課閘，特意教吓馬學識留力，同埋今場鞍上人發揮得好，結果後發先至贏返場。