馬體會未回魂 讓波擇使

猪拉多纳

今晚西甲馬德里體育會作客華拉度列，論牌面馬體會贏條街喇，不過「床單兵團」近期頭頭碰着黑，喺射手法卡奧缺態下，唔單止聯賽頻頻失分，上周中歐霸對魯賓卡山，更被打爛佢哋今季主場全勝金漆招牌，後備門將沙治奧阿辛祖更離奇棄關助攻累球隊輸夠兩粒，信心、士氣直插谷底，面對主場硬淨到暈嘅華拉度列，馬體會仲要讓波純粹係名牌效應，斯維推介「讓球主勝」。

（now 632周一凌晨2時直播）

馬體會踏入2013年惡運纏身，先有王牌射手法卡奧受傷，直接影響隊友信心，贏波都係僅僅熟，作客更接連輸畀畢爾包及華歷簡奴。雖然法卡奧已傷愈復出，但明顯狀態未弗，上周中歐霸32強首回合迎戰唔算太強嘅俄超球隊魯賓卡山，教練施蒙尼特登用番多啲主力，希望贏番仗等球員重建信心，點知門將沙治奧阿辛祖無喇喇上前助攻，被對方反擊射空門輸夠兩球，今季各項賽事主場19連勝亦告斷纜，嚴重打擊士氣。
華拉度列主場夠惡

升班球隊華拉度列能位處中游，原因係佢哋主場表現硬淨，喺主力查維亞古艾拿、奧斯卡干沙里斯、貝爾奴帶領下，今季13場於地頭作戰只係輸過3場咁大把，「床單兵團」依家沉到爆仲要讓波，實在過晒火位，「讓球主勝」非常抵玩。