車仔黑雙煞「大」起賓福特

猪拉多纳

倫敦富豪球會車路士喺英格蘭足總盃第四圈重賽返主場再戰鄰居賓福特，車仔上次作客死過翻生，唔敢再揸流攤，最重要係王子費蘭度托利斯剛於歐霸盃搏完，今場輪到抖夠嘅「新魔獸」丹巴巴亞擔正攻堅，令人放心好多，加上域陀摩西斯強勢回歸，兩位黑人前鋒拍住上係士哥信心保證，大炒味濃，大細中位數調高至3.5球照推介大盤！

（now 632周日晚8時直播）

車路士啱啱飛去捷克踢完歐霸盃，匆匆再戰，唔少人擔心班波未恢復體力，雖然教頭賓尼迪斯成日話班波唔夠人用，但查實佢哋都仲有好多選擇，射手丹巴巴亞冇得踢歐霸盃，抖足精神可以落場搏殺，呢點係今場揀大盤主因，呢隻「新魔獸」加盟初期好順，衰在「肥賓」成日都要用契仔托利斯窒住佢道氣，今次教頭名正言順畀王子休戰，丹巴巴亞係時候嚟料。
丹巴巴亞域陀摩西斯有火花

除「新魔獸」復出，車路士仲有尼日利亞雙星域陀摩西斯同約翰米基爾歸隊，中前場人手充裕。車仔喺足總盃第三圈作客狂數修咸頓5比1，當日正是由丹巴巴亞拍住域陀摩西斯攻堅，兩位仁兄心靈相通，畀波走位夾到暈，嗰場包辦三個士哥，相隔個零月有機會再次在前鋒線拍住上，實在令人充滿期待，亦隱約感受到一陣大炒味道。

賓福特上次主場對車路士捉到鹿唔識脫角，尾段畀費蘭度托利斯士哥逼和2比2，重賽去到史丹福橋球場肯定會捱打。大軍最強攻擊武器係富咸借將馬些路托達，呢位意大利小將喺U21賽事超晒班，轉戰英甲仍然交到貨，上次鬥車路士都為球隊先開紀錄，今仗仍有機會爭取士哥。車仔上次玩嘢差啲出局，今次不敢怠慢，定必大打真軍，中位數調高至3.5球照捧大盤！