史雲頓內訌難拆車

猪拉多纳

英甲周中繼續有賽事進行，其中高車士打主場對史雲頓。最近史雲頓領隊迪肯尼奧與球隊高層鬧不和，更盛傳「狂人」會劈炮唔撈，事件令球隊氣氛變壞，大大影響爭勝機會，加上今場要作客，未必讓得起主隊，「讓球主勝」可捧。

（周三凌晨3時45分開賽）
主帥迪肯尼奧擬劈炮

早前史雲頓高層將馬特列治出售到般尼茅夫，而事前未有通知迪肯尼奧，呢位意籍領隊覺得不受尊重，正考慮與球隊解除合約。馬特列治係球隊聯賽首席射手，深得迪肯尼奧寵愛，高層問都唔問就將呢位「十號仔」出售，自然令迪帥嬲到出煙。而有球迷仲喺網上留言，要求史雲頓就出售馬特列治向大家解釋，依家史雲頓陣內氣氛不佳，對於球隊爭好成績會構成阻礙。

高車士打球員質素未必及得上史雲頓，但球隊最近大打爭氣波連贏兩場，士氣一定比客隊優勝。要留意一點，今次已經係史雲頓連續第三場作客，球員體力或有不足，今場史雲頓讓波唔抵，決捧高車士打「讓球主勝」。