加納3星回歸威畀你睇

猪拉多纳

非國盃今晚重燃戰火，首場8強戰由加納迎戰佛得角，力奇撐1.62倍主勝，事關「黑星」今仗有3大主力回歸，反觀佛得角單靠「莫連奴速成班」弟子盧斯奧安東尼斯領軍求創奇迹，睇佢哋分組賽演出已經逐漸見底，8強應該行人止步。（now676台周六晚11:00直播）
佛得角主帥臨急學莫連奴法

分組賽首戰踢和剛果民主共和國2:2後，「黑星」終於上力連贏馬里同尼日爾。最抵死係領隊艾卡華斯艾比亞寸到話只係出咗7成力，話班波嚟到淘汰賽先會上到高峰，人腳方面，加納嘅中場梅巴拉克、安蘭同前鋒耶當保亞基今仗齊齊復出，今屆加納首3個入波當中，有2個關梅巴拉克事，佢今仗坐完波監，隊波鋒力肯定倍增。

佛得角嘅主帥盧斯奧安東尼斯名不經傳，為咗今次賽事，早前專程去過皇馬跟莫連奴學法6日，但臨急抱佛腳又學得幾多？冇錯，佢哋喺分組賽3戰得1勝2和，但後兩仗都有失波。始終班波以葡超二線兵同法乙球員為主，實力有限，舊年佢哋喺葡萄牙同加納友賽都輸1球，今鋪睇怕難逃一敗。
盃賽賽制

非國盃：今輪為8強戰，以一場過分勝負，若法定時間內打成平手，需加時作賽，再和就互射12碼決勝。

蘇總：今輪為16強戰，若法定時間內打成平手，需要擇日重賽。