西維爾受讓體定食

猪拉多纳

易帥後回復勁旅本色

今晚西盃四強首回合，上演2010年決賽翻版戲碼，由馬德里體育會主場火併西維爾。馬體會自射手法卡奧受傷後攻力大減，表現跌晒Watt，相反西維爾喺新帥艾美利領軍下未輸過，愈戰愈勇，有力打破馬體會今季主場全勝嘅「金漆招牌」，受讓半一宜趁早入貨。

（now 632周五清晨5時直播）

若說馬體會係法卡奧嘅一人球隊，並唔過分，因為教練施蒙尼完全係圍繞佢做核心，設計一套穩守突擊戰術，所有球員都要為呢位哥倫比亞箭頭服務，例如前線拍檔迪亞高哥斯達，會不惜氣力周圍走做串連及製造空間，讓法卡奧舒服地完成最後一擊。
冇法卡奧馬體會即謝晒

不幸地法卡奧呢隻「老虎」上周對利雲特受傷，馬體會門前把握力立即削晒，成隊踢來方寸大亂，近兩仗一和一負僅入一粒，看來施帥並冇應急B計劃，都咪話唔頭痕。

西維爾自從得艾美利接手後，四戰兩勝兩和，表現重上正軌，主將尼格度、拿傑迪錫、捷西斯拿華斯個個着晒火，至於上季同馬體會不歡而散嘅「電單車」雷恩斯，返回成名地西維爾後亦告回勇，今仗倒戈誓要喺「床單兵團」面前騷哥利。

今季馬體會主場戰績彪炳，各項賽事共十七場全部贏晒，相信係今仗讓到半一咁過火嘅原因，不過此一時彼一時，冇咗法卡奧嘅主隊猶如冇牙老虎，實在讓唔起有新帥效應兼復甦嘅西維爾，強捧下盤。