車仔「大」力踩油炒賓福特

猪拉多纳

盃賽遇弱連番屠殺

車路士啱啱喺英格蘭聯賽盃悲痛出局兼發生「執波鬧劇」，未有時間哭波喪就要拉大隊作客英甲賓福特，踢足總盃第四圈賽事。呢場係倫敦打吡，大佬車路士谷谷埋埋成肚氣，勢將細佬賓福特當成出氣袋，佢哋今季最叻大蝦細，國內盃賽鬥低組別球隊例炒對手，今場要晒車仔「讓球客勝」同大盤！

（now 633及660周日晚8時直播）

車路士剛於聯賽盃出局，進攻主力夏薩特陣上怒踢執波仔被逐，搞到今戰要坐波監，正路計確係會削弱球隊進攻火力。
狼隊列斯聯修咸頓全炒

不過大軍上場攻極唔入好唔忿氣，一眾球員個個火遮眼，今次對住英甲倫敦市細佬賓福特，正好畀個機會佢哋發洩，前線無論出丹巴巴亞定費蘭度托利斯，都會反客為主喪攻對手，防線則有精神領袖泰利復出領軍，爆炸頭大衞雷斯就受傷休戰。

車路士聯賽爭標機會渺茫，足總盃係季內重要目標，佢哋近六屆四次捧盃，叫佢哋做足總盃之王一啲都唔誇張，教頭賓尼迪斯無論拎唔拎到一紙長約，都想捧番隻盃整靚自己張履歷，隊內球員亦要為前途而戰。車仔今季專喺盃賽恰低組別球隊，曾於聯賽盃主場6比0數狼隊，另於聯賽盃作客列斯聯大勝5比1，上圈足總盃作客英超修咸頓照贏5比1，決心好大。

賓福特目前於英甲位居前列，聯賽廿八戰只輸四場，演出相當穩定，不過佢哋依家頂盡都係得英冠中游水平，今次對住隻受咗傷嘅英超老虎，兩隊根本唔係處於同一檔次，無論點樣落力逼搶，恐怕都係徒勞無功，隨時大敗收場。