巴塞速決半場大起奧沙

猪拉多纳

美斯受傷冇有怕！今晚「西甲一哥」巴塞隆拿主場迎戰尾三奧沙辛拿，上周中西盃因傷退下火線嘅王牌美斯，今仗可能避戰，不過另一射手韋拿早已準備就緒，誓要證明自己實力，而且「地上最強」周中西盃四強要作客硬撼皇馬，今仗務必速戰速決，入多幾粒盡快鎖定勝局，用勝利為剛生日嘅老將沙維慶祝，順便等班球員下半場可hea踢留力，「半場大」更值博。

（now 632周一凌晨2時直播）
留力下周中西盃撼皇馬

上周中巴塞喺西盃八強次回合4比2擊敗馬拉加，但美斯入第四粒後主動要求助教勞拉換走佢，賽後證實右腳大腿唔舒服，之後一日更缺席操練，明顯未好番，加上周中西盃火併皇馬仲緊要，勞拉可能會畀美斯抖下。好彩巴塞兵多將廣，尤其係今季鬱鬱不得志嘅韋拿，傷愈後不獲重用，但佢喺有限出場時間交出十個士哥，難得今仗美斯輪休，絕對係呢位西班牙射手騷哥利時候。

奧沙辛拿防守雖唔錯，但去到魯營無謂以卵擊石，留番啖氣下仗對同級球隊切爾達先搶分好過。而巴塞亦有硬撼皇馬後顧，上半場必搶攻，希望盡快將比賽放入雪櫃，並且為上周五度過33歲牛一嘅中場大腦沙維補祝生日，「半場主勝」冇肉食，捧1.72倍嘅「半場大」。