超霸鷹強勢爆「基」

猪拉多纳

搞好紀律　實而不華

非洲國家盃C組開打，「超霸鷹」尼日利亞於南非內爾斯普雷特迎戰布基納法索，尼日利亞教頭基舒點兵重視紀律多過技術，連好波之人奧丹維治都因為多口被棄，呢隊「超霸鷹」未必係最強人腳，但起碼聽教聽話，踢落有隊形，對住次級布基納法索夠殺o架喇，捧主勝！

（now 676周二凌晨2時直播）

非洲球隊出名紀律曳，球員冇規冇矩，鍾意踢就踢，唔鍾意就詐傷唔返國家隊報到，好少見到科特迪瓦球星杜奧巴呢種忠心報國之人。尼日利亞主帥基舒之前教過多哥，早已見識過艾迪巴約呢類球星有幾麻煩，前年年尾上任後教尼日利亞第一件事就係搞好紀律，踢走滋事分子。射手奧丹維治出名麻煩，經常同基舒對着幹，今次梗係冇份入選啦，基舒話尼日利亞大把好球員，唔使用到奧丹維治喎。
車仔孖寶坐鎮尼日利亞

另外，尼日利亞仲少咗耶高保、馬田斯及烏達卡等熟悉面孔，似乎唔多齊人，但呢班大名球員已不復當年勇，依家呢隊波實而不華隨時仲好。尼日利亞今屆主力包括車路士中場約翰米基爾同前鋒域陀摩西斯，佢哋長期喺高水平賽事作賽，級數超超哋，至於防線就由前愛華頓大將尤保領軍，三線都有個球星帶住踢，算係咁喇！布基納法索上屆分組賽三戰全敗，冇乜料到，今次都係難望爆冷。