阿積士「讓主」有著「諾」

猪拉多纳

阿積士早排喺對曼城場歐聯整咗幾幅「打倒老細足球」橫額，實行向富豪球會嘅壟斷行為同埋高價波飛說不，小妹睇到都覺得創意同意義兼備，點知歐洲足協早幾日宣布就呢項舉動向阿積士罰款1萬歐元，認真冇陰功！好在阿積士有嘅係實力，今晚喺地頭迎戰作客唔掂嘅飛燕諾，小妹決定取2.28倍「讓主」！

（now639台周日晚9:30直播）
飛燕諾離開地頭即腳軟

雖然無啦啦畀人罰錢，但小妹相信並唔會影響阿積士準備呢場大戰，查實除咗歐聯之外，呢班波喺荷甲主場嘅成績都算好穩定，佢哋歇冬前只係失手輸過畀維迪斯，其餘對住燕豪芬同川迪都一樣照贏，除咗盛傳係紐卡素目標嘅施安迪莊入球頻頻，阿積士仲有13個球員喺今季聯賽攞過「士哥」，入球點分布夠晒廣，趁住飛燕諾條防線近期失波連連，要省多幾粒並唔難。

其實客軍飛燕諾亦有射手加斯安奴柏利着晒火，近8戰得1場冇波入合共取得11個士哥，最弊呢位射手睇數字就勁，原因係佢同另一位中場恩馬斯嘅入球大部分係嚟自主場，一作客就啞晒火，好難旨意佢哋今戰有好表現。況且飛燕諾今季作客燕豪芬同川迪等勁旅都大敗而回，今場面對阿積士，唔畀人大炒都要還神啦！