皇馬反擊「-1」必達

猪拉多纳

今晚西班牙盃十六強次回合，落後一粒嘅「銀河艦隊」皇家馬德里返回主場再鬥切爾達，誓演絕地反擊戰。好彩除咗C朗、賓施馬回勇之外，另一殺手希古恩亦傷愈候命，加上眾將同主帥莫連奴和解，內部士氣、信心返晒嚟，今仗大有不勝無歸之勢，「讓球主勝」值博。

（now 632周四凌晨4時30分直播）

由於聯賽被巴塞大幅拋離，歐聯又遭逢英超班霸曼聯，因此西盃成為皇馬最有機會染指嘅錦標。幸好經過歇冬期抖抖，皇馬班球星明顯有復甦迹象，其中首席射手C朗同賓施馬，於前場嘅默契愈來愈純熟，後者無私踢法，不斷為C朗製造射門空間，配合迪馬利亞同奧斯爾嘅後上支援，冷板仲有傷愈嘅希古恩躍躍欲試，進攻火力並冇減弱。
切爾達近10作客輸9場

最重要係皇馬眾將日前喺更衣室開咗個緊急會議，決定同教練莫連奴大和解，至少喺今季結束前，全隊會為爭標團結一致，而同莫帥唔咬弦嘅隊長卡斯拿斯，預計今仗獲得解封，有呢位精神領袖壓陣，定必士氣大振。皇馬首回合只係輸1比2，兼有一個作客入球，面對攻力疲弱、近十作客輸足九場嘅切爾達，「銀河艦隊」誓要報番一箭之仇，大炒一場兼晉級，「讓球主勝」熱透有計。