愛華頓煲魚生粥

猪拉多纳

今晚英格蘭足總盃第3圈有英乙球隊車頓咸主場迎戰愛華頓，雖然兩軍相差3個聯賽級別，但小妹覺得坐鎮主場嘅車頓咸唔會咁易認輸，而且連番惡戰嘅「拖肥糖」元氣大傷後，相信會收起唔少主力，贏波唔奇但大炒有難度，都係捧3.65倍「讓球和」！

（now633及660周二凌晨3:45直播）
「拖肥糖」近15場未嘗大捷

愛華頓領隊莫耶斯賽前例牌話唔會睇低車頓咸，但就勁蠱惑咁唔肯講會唔會強陣出擊喎！小妹就覺得佢調整陣容係事在必行喇，皆因「拖肥糖」踢完呢場，幾日後就要喺聯賽惡鬥唔易啃嘅史雲斯，畀班連鬥車路士同紐卡素後踢到殘晒嘅主力休息吓，亦係理所當然嘅事，亦即係話莫耶斯大有可能收起費蘭尼同謝拉域兩大入球泉源，就算有今季英超入4球嘅安尼捷比壓陣，以「拖肥糖」近15場賽事未試過贏對手多過1粒嘅表現睇，想炒起「英乙車仔」真係難啲，今場都係小勝格。
車頓咸近10主場輸得1次

車頓咸曾經喺00至01球季嘅足總盃，越級砌低奧咸同般尼，雖然家陣喺英超名列前茅嘅愛華頓再高幾班，但當年場上功臣之一、現任領隊馬克耶迪斯絕對唔會未踢先認輸，更信心十足話o趙低「拖肥糖」並唔係冇可能，仲指若成事，將會係球會126年嚟最大嘅成就！佢呼籲球迷到時落力打氣，有「第12人」幫手，小妹相信班球員唔會咁易投降嘅！

查實目前喺英乙排第4嘅「車仔」近10場主場只係輸過1次，絕對唔係魚腩部隊，加埋有全英乙保持不失球場數最多嘅門將史葛布朗把關，愛華頓都係諗吓點煲番煲靚魚生粥好過。
賽制：

今輪為第3圈賽事，如法定時間內打和將擇日重賽。