史雲斯阿仙奴演入球騷

猪拉多纳

是日足總盃仲有場英超技術流球隊對決，史雲斯主場鬥阿仙奴，兩隊上次交手史雲斯射手米捷一個入兩粒威晒，「兵工廠」今次存心復仇，佢哋恨捧盃恨到發燒，後備射手基奧特及謝雲奴等都要爭取表現，實同對手鬥攻，預期入波唔會少，要大！

（now 633及660周日晚9時30分直播）

史雲斯首循環聯賽作客阿仙奴以穩守突擊戰術打謝對手，射手米捷尾段梅開二度盡顯級數，兩隊都係踢短傳入滲，佢哋陣上組織同傳送流暢度仲好過對手，好鬼犀利！米捷上場對維拉同丹尼格拉咸拍住上，加上柏保路靴南迪斯同魯迪治喺兩側支援，呢個進攻組合威力都幾勁，今次返到主場出戰更可放膽搶攻。
基奧特謝雲奴踢身價波

另一邊廂阿仙奴上次捧盃已經係○五年贏足總盃，經歷接近八年錦標荒後，連教頭雲格都高調表示好想贏番隻盃。近日英國傳媒指「兵工廠」有機會簽下巴塞射手韋拿，基奧特同謝雲奴等後備前鋒要生生性性踢好波，今次佢哋有機會喺盃賽落場搏殺，實會去盡爭取入波，兩班波都有士哥本錢，捧入球大最好。